Sumarið 2021 verður boðið upp
á fjögur tímabil. Sumarbúðirnar eru ætlaðar börnum á aldrinum 9-14 ára, fædd 2012-2007. Það er líf og fjör að mæta
í sumarbúðir og kynnast nýjum krökkum, náttúrunni og fara í spennandi dagskrá. Dæmi um dagskrá í
sumarbúðum skáta er klifur, vatnasafarí, þrautabraut, bátar, bogfimi, leikir, þrautir, kvöldvökur og ýmislegt fleira.
Öll aðstaða er eins og best verður á kosið. Þátttakendur gista í 4-8 manna herbergjum í JB-skála og DSÚ-skála á aðalsvæði Útilífsmiðstöðvarinnar. Öll herbergi eru með kojum. Þátttakendum verður raðað saman í herbergi þegar komið er á svæðið og geta vinir óskað eftir því að vera saman í herbergi.
Aðstaða til útivistar gerist vart betri, fjöldi leiktækja og þrautabrauta, stærsti klifur- og sigturn landsins og margar skemmtilegar gönguleiðir. Starfsmennirnir eru stoltir af því að bjóða upp á metnaðarfulla dagskrá sem nær vel til krakka. Í sumarbúðunum eru allir þátttakendur og takast á við spennandi viðfangsefni í náttúrulegu og öruggu umhverfi.
Sumarbúðir skáta á Úlfljótsvatni eru fyrir alla káta krakka á aldrinum 9- 14 ára. Sumarbúðirnar eru reknar af skátahreyfingunni og eru gildi hennar höfð til hliðsjónar í öllu starfi. Sumarbúðirnar hafa
verið starfræktar að Úlfljótsvatni síðan 1941. Framan af var aðeins um að ræða sumarbúðir fyrir skáta, og sváfu þeir fyrstu árin í tjöldum. Útilífsmiðstöð skáta Úlfljótsvatni er í Grafningi, skammt frá Ljósafossvirkjun. Jörðin er í eigu skáta og Skógræktarfélags Íslands. Útilífsmiðstöðin hefur um áratuga skeið verið aðalbækistöð skáta á Íslandi. Þar er miðstöð foringjaþjálfunnar skáta, aðstaða fyrir skátamót, skólabúðir, sumarbúðir og tjaldsvæði fyrir almenning.
Markmið sumarbúða skáta eru að börnin: komist í snertingu við náttúruna, kynnist spennandi útilífsstarfi skátahreyfingarinnar, taki þátt í þroskandi leik og starfi, eignist félaga úr fjölbreyttum hópi, læri að taka tillit til hvert annars, læri að gangast undir sameiginlegar
reglur og njóti sín sem einstaklingar.
